عنوان الموضوع : لـــــــــــــــكم كلكم... سعودي
مقدم من طرف منتديات بنت السعودية النسائي

..السلام عليكم و رحمـــــــة الله و بركاته..




مباشره و بدون مقدمات,كتبت هذا الموضوع لأني استغرب من حال بعض النساء من خلال المواضيع اللي يكتبنها..شكاوي غريبه


و احيانا مالها اي داعي..



انا ماني ضد عرض الشكوى او طلب الحل


بالعكس انا اؤيد هذا الشي بحالة وحده و هي


انه يكون هناك مشكله موجوده فعلا.



بالنسبه للمشاكل اللي فعلا مشاكل هنا كتبت


لها الحلول من تجربتي الخاصه..





اما للي مشكلاتهن بسيطه مثل اللي تقول:


انا زوجي نسى عيد تاريخ زواجنا


و اللي تقول انا زوجي ما يضمني قبل ينام


و اللي تقول زوجي ما عمره سوى لي ليله رومنسيه


و اللي و اللي و اللي...


هذي مو مشاكل هذي اشياء زايد هان صارت افرحي فيها بس اذا ماصارت لا تعتبرينها مشكله..







انا بقسم موضوعي لعدة نقاط عشان ان شاء الله يكون اسهل عليكم في القرأة:






أولا: بقول كلمه عامه تشمل جميع حالات المتزوجات:



يا أخواتي يا حبيباتي ما فيه بيت يخلو من المشاكل أدري انكم بتقولون سالفة قديمه سمعناها مية مره..


بس بقولك لا هالمره غير اسمعيني للأخير...


احيانا المشاكل ما تكون اساس حقد او لسبب


الكره او بقصد ايذاء الاخرين, مو كل مره يجيك كلام من احد


يكون معناه ان هذا الشخص قاصد يأذيك او يجرحك أو يسبب لك مشكله و بعطيك مثال من مواقف صارت لي:



انا و اهل زوجي الحمد لله متفاهمين كثير و احبهم و يحبوني مع ذلك صارت مشاكل كثيره


.....(مره كنت احس بالضيق ابغى اطلع و اغير جو و طلبت من زوجي يطلعني و اعتذر مني قال ابغى اكتب بحث و مادري ايش..أنا قدرت ظروفه و قلت خلاص براحتك دراستك اهم و اهلي في مدينه ثانيه يعني ما عندي اي امل اطلع مع غيره...


المهم..


بعد نص ساعه جاء عندي و قال امسكي الولد


لا يشوفني و يتعلق فيني انا بروح اودي اختي..


تخيلي... لو كنتي مكاني وش بتكون ردت فعلك


مع العلم ان اخته عندها سبع اخوان غيره ما شاء الله و زوجها سامح لها تركب تاكسي اذا راح معها ولد اختها محرم..


يعني عندها سبع فرص و انا ماعندي الا هو و رفض يوديني...


بصراحه عصبت و بكيت و قلت انت نذل


انت ماترحم انا اضحي عشانك و انت ما رحمتني انا هنا وحيده ما عندي غيرك..


طبعا وصل الكلام لأخته...



و هنا الكل زعلان انا زعلانه من زوجي و زوجي زعلان مني و اخته زعلانه مني..


و اخر شي تعرفوا ايش صار...


انا عرفت انه طلع صدفه عند باب الشارع


ولقى اخته بتركب تاكسي بتروح للمستشفى لأنها تعبانه و قالها لا و الله


ما تركبين تاكسي و انتي تعبانه و انا موجود..


يعني هو طلع مظلوم..


و بعدين لما عرفت اخته اني انا مو قصدي هي


و اني انا كنت طفشانه و طلبت منه يطلعني قبل..قدرت ظروفي لانها هي زي ظروفي متزوجه بعيد عن اهلها..


و انا انحرجت لما عرفت انها كانت تعبانه


و انه كان بياخذها للمستشفى..


يعني ياريت الواحد يسأل و يصبر قبل ما يتكلم لأن هو ماكان قصده اهمال لي و انا ما كان قصدي احسد اخته و اخته ما فهمت موقفي من أول مره)....


و اذا كنت متأكده ان الناس اللي جرحوك متعمدين أو يبغون يجرحونك هذي لك طريقه ثانيه..


اذا كانت امه طبعا لا تفكرين انك يوم من الايام تحرضين ولدها عليها و لو هو رد على امه اذا جرحتك المفروض تزعلين منه لأنها أمـــــــه..


ما يجوز مهما صار انك تحرضينه عليها..


حتى شرعا لو طلبت منه امه ان يطلقك يجوز انه يستجيب لطلبها..


الله عظم حقها,تراك انتي ما تخضعين لها ,انتي تخضعين لله..و تنفذين اوامر الله..


و اصبري و احتسبي و ترى دوام الحال من المحال و الله سبحانه هو اللي علمنا:


(و ادفع بالسيئة الحسنه فاذا اللذي بينك و بينه عداوه كأنه ولي حميم) الرجاء تصحيح الايه اذا كنت اخطأت



و كلنا نعرف ان الله كلامه الحق سبحانه..


لا يخطيء ولا يزل..


هاه بتسمعين كلام ربــــــــك ولا لأ..


اما اذا كان غير ام الزوج فالايه السابقة تنطبق على هذي الحاله بعد, أو تقدرين تردين على الشخص برد دبلوماسي مع ابتسامه فاذا كان قلبه طيب بيحبك و يتوقف عن اذيتك و اذا كان قلبه فيه شر بتقهرينه و تردين كيده في نحره..







ثــــانيا: اذا اكنت المشكله بس في زوجك يعني


ما عندك مشكله مع احد ثاني غيره..



هذي تنقسم الى عدة اقسام:


1- اذا كان من النوع اللي يخرج و تشكين بطلعاته و تحسين انه يسوي شي خطا أو انه راعي سفريات و تخافين عليه من الزنا أو أي شي ثاني..


أو انه يروح لعمل يتعامل فيه مع نساء مثل صاحب محل أو أستاذ جامعي أو موظف في مكان مختلط مثل المستشفيات و تخافين عليه من الفتنه و من كيد هذه النساء..



عندك حلول كثيره بس انا ما عندي لك الا حل


وااااااااحد


سهل


مضمون


و اللي ينفذه لا يخطيء ولا يزل


أقولك ايش..


استودعيه الله و الله لا يضيع ودائع خلقه, اذا خرج من عندك قولي له استودعك الله الذي لا تضيع ودائعه..


قولي لي تثقين بأحد غير الله؟؟


ما أعتقد..


وراح تحسين براحه لما تقولينها..


لأنك تعاملتي مع الله..



2-اذا كانت مشكلة زوجك غير الخروج..


يعني اي مشكله ثانيه زي القسوه, الأهمال , البخل , الكره, الضرب , الخيانه , الكذب,


أو اي شيء حتى لو كان بسيط..



هالمره عندك ثلاث حلول:



الأول: سهام الليل..صلي ركعات بجوف الليل و ادعي ربك من اعماق قلبك و ربك ما ينساك اما يستجيب لك أو يدخرها لك وقت ما تحتاجينها لأنه يعلم ما لا تعلمين.



الثاني:الاستغفار..ياألهي لو تعرفون نتائج الاستغفار..فعلا عظيمه لو ما اخذتي منها الا


الراحه النفسيه و القرب من الله..


حدثت لي اشياء كثيره حلوه بفضل الاستغفار و لأمي بعد و لناس كثيرين.. و اذا تبين اكثر اكتبي بقوقل قصص الاستغفار و اقرأي..



ثالثا:انصح كل زوجه انها تقرأ دورات و نصائح الأستاذه ناعمه الهاشمي لانها تخليك تنظرين الى الرجل بنظره ثااااااانيه مختلفه كثير..


أو اقرأي كتاب الرجال من المريخ و النساء من الزهره يساعدك تفهمين الرجل اكثر من أول..








ثالثـــــــــا:اذا كانت المشكله شي ثاني مو من زوجك ولا من اهله..في اولادك مثلا في ظروفك الماديه في امراض لا سمح الله او اي مشاكل ثانيه,هنا قدامك حلين:


الأول: ذكرناه سابقا وهو الأستغفار..


الثاني:التوكل على الله و الثقه به و الرضى بما قسم لك, و اهم شي الشكر على النعم اللي موجوده عندك(ولإن شكرتم لأزيدنكم)..





في النهايه انا ما جيت اتفلسف او ادعي الكمال


لا و الله انا صارت لي مشاكل و ادري انه بتصير لي كمان مشاكل لاني بشر و أعيش مع بشر و البشر كلهم يخطئون..


و احيانا اذا عصبت و حسيت بالظلم يروح عن بالي كل هذا الكلام اللي كتبته..


لكني في احيان كثيره اتذكره و الحمد لله اني اتذكره..


و اتمنى انكم تكونوا احسن مني و تذكرونه دايما..


واذا يأستوا و ضاقت بكم الدنيا ولا جاكم فرج


تأكدو ان الله لا يضيع اجر الصابرين..


و تأكدي انه ادخرها لك في وقت ثاني..


و تأكدي انك سواء عشتي عيشة اسعد السعداء أو اتعس التعساء فأنت الى زوال و مصيرك قبر مظلم موحش لا تنفعك سعادتك ولا حزنك ولا زوجك


كل ما ينفعك هو عملك...في تلك اللحظه ستسأنسين بصبرك و تتمنين انك صبرتي أكثر و اكثر ليزداد نعيمك..


اسأل الله أن يجعلني و اياكم و والدي ممن قبورهم روضه من جنات النعيم..قولوا امين..



كلمـــــــــــــــــــــــــــــــــــة أخيرة:


..كمـــــا تدين تــــــدان..



>>>>> ردود الأعضـــــــــــــــــــاء على الموضوع <<<<<
==================================

>>>> الرد الأول :
الله عليك يالغاليه وعلى كلماتك اللي ترد الروح
ايه والله مافي احسن من اللجوء الى الله في كل وقت سبحان الله
وانا معاك على الاستغفار فضائله كثيره ولاتحصى وليت كل وحده فينا تتمسك بهالامر العظيم
انارالله قلبك وسخر زوجك
سلمت يداك على الكلام اللي كتبتيه

تقبلي مروري

__________________________________________________ __________

>>>> الرد الثاني :
موضووووووووووعك عجبني بشكل ماتتصورينه وقراته مرتين

تسلم اناملك وكم نحن بحاجه لمثل هالموااضيع الحلووووووة

اللي ترد الرووووووح وتنعش الفؤاااد

وفعلا الاستغفاار فيه قوووة عجيبه على تيسير الامووور باذن الله

جزاكي الله خيراا واناار دربك ولاتحرمينا من جديدك يالغلا

وتقبلي مرررررررور خيتك الجودها

__________________________________________________ __________

>>>> الرد الثالث :
موضووووووووووووووووووووووووع قمه في الروعه
تسلم الايااااااااااااادي

__________________________________________________ __________

>>>> الرد الرابع :


__________________________________________________ __________

>>>> الرد الخامس :